న్యూస్ డెస్క్: ప్రపంచవ్యాప్తంగా ఆర్టిఫిషియల్ ఇంటెలిజెన్స్ (AI) ప్రభావం శరవేగంగా విస్తరిస్తోంది. AI వల్ల ఉద్యోగాలు పోతాయనే ఆందోళన ఒకవైపు ఉన్నా, భారతీయ కంపెనీలు మాత్రం ఈ నూతన సాంకేతికతను అందిపుచ్చుకోవడంలో ముందున్నాయి.
EY-CII సంయుక్తంగా విడుదల చేసిన “ది AIడియా ఆఫ్ ఇండియా: అవుట్లుక్ 2026” నివేదిక ప్రకారం, దేశంలోని సుమారు సగం (47%) కంపెనీలు ఇప్పటికే బహుళ జనరేటివ్ AI (GenAI)ని ఉత్పత్తిలో వినియోగిస్తున్నాయి.
ఈ నివేదిక కోసం 200 భారతీయ సంస్థల (ప్రభుత్వ రంగం, స్టార్టప్లు, MNCలు) ప్రతినిధుల నుంచి అభిప్రాయాలు సేకరించారు. AIపై భారతీయ సంస్థలకు విశ్వాసం పెరుగుతోందని ఈ నివేదిక హైలైట్ చేసింది.
నివేదిక ప్రకారం, 76% మంది వ్యాపార నాయకులు GenAI గణనీయమైన ప్రభావాన్ని చూపుతుందని బలంగా నమ్ముతున్నారు. వీరిలో 63% మంది దాన్ని తమ వ్యాపారాల్లో వినియోగించుకోవడానికి సిద్ధంగా ఉన్నారు.
రాబోయే 12 నెలల్లో, కంపెనీలు ప్రధానంగా పెట్టుబడుల కార్యకలాపాలు (63%), వినియోగదారుల సేవ (54%), మార్కెటింగ్ (33%) రంగాల్లో AIపై దృష్టి పెట్టనున్నాయి.
AI టెక్నాలజీని సొంతంగా నిర్మించుకోవడం (Build) కంటే, బయట నుంచి కొనుగోలు (Buy) చేయడానికే 91% మంది ప్రాధాన్యత ఇస్తున్నారు. దీనికి కారణం, వేగంగా తమ కార్యకలాపాలను విస్తరించాలనే ఆలోచనే.