న్యూస్ డెస్క్: IND vs AUS: ఆస్ట్రేలియా పర్యటనలో భారత్ బలంగా పుంజుకుంది. ఓవల్ వేదికగా జరిగిన మూడో టీ20లో ఆతిథ్య జట్టుపై 5 వికెట్ల తేడాతో ఘన విజయం సాధించింది. ఈ గెలుపుతో ఐదు మ్యాచ్ల సిరీస్ను 1-1తో సమం చేసింది. వాషింగ్టన్ సుందర్ (49*) చివరి వరకు నిలిచి జట్టును గెలిపించాడు.
తొలుత బ్యాటింగ్ చేసిన ఆస్ట్రేలియా, ఓపెనర్లు విఫలమైనా, భారీ స్కోరు సాధించింది. టిమ్ డేవిడ్ (74), మార్కస్ స్టోయినిస్ (64) అర్ధ సెంచరీలతో విధ్వంసం సృష్టించారు. వీరిద్దరి దూకుడుతో ఆసీస్ నిర్ణీత 20 ఓవర్లలో 6 వికెట్ల నష్టానికి 186 పరుగులు చేసింది.
భారత బౌలర్లలో అర్షదీప్ సింగ్, వరుణ్ చక్రవర్తి చెరో రెండు వికెట్లు పడగొట్టి ఆసీస్ జోరుకు కాస్త కళ్లెం వేశారు.
187 పరుగుల మోస్తరు లక్ష్య ఛేదనలో భారత్కు అభిషేక్ శర్మ (25) మెరుపు ఆరంభాన్ని ఇచ్చాడు. ఆ తర్వాత కెప్టెన్ సూర్యకుమార్ యాదవ్ (24), తిలక్ వర్మ (29) ఫర్వాలేదనిపించారు.
అయితే, కీలక సమయంలో క్రీజులోకి వచ్చిన వాషింగ్టన్ సుందర్ అద్భుతంగా ఆడాడు. కేవలం 26 బంతుల్లో 49 పరుగులు చేసి అజేయంగా నిలిచాడు. జితేశ్ శర్మతో కలిసి మ్యాచ్ను ముగించాడు. 18.3 ఓవర్లలోనే భారత్ 5 వికెట్లు కోల్పోయి లక్ష్యాన్ని ఛేదించింది.
తొలి టీ20 వర్షం కారణంగా రద్దు కాగా, రెండో మ్యాచ్లో ఆసీస్ గెలిచింది. ఇప్పుడు భారత్ ఈ విజయంతో సిరీస్ను సమం చేసి, తదుపరి మ్యాచ్లకు ఆత్మవిశ్వాసంతో సిద్ధమైంది.