కొత్త సినిమాలు, ఓటీటీ కంటెంట్‌ను పైరసీ చేస్తూ టాలీవుడ్ నిర్మాతలకు కంటిమీద కునుకు లేకుండా చేసిన ‘ఐ-బొమ్మ’ (iBomma) వెబ్‌సైట్‌పై పోలీసులు ఉక్కుపాదం మోపారు. ఈ పైరసీ సైట్ వల్ల పరిశ్రమకు రూ. 2,000 కోట్లకు పైగా నష్టం వాటిల్లినట్లు నిర్మాతలు గతంలో ఫిర్యాదు చేశారు.
ఈ పైరసీ నెట్‌వర్క్ వెనుక సూత్రధారి రవి అనే వ్యక్తి అని గుర్తించిన హైదరాబాద్ సీసీఎస్ పోలీసులు, అతని కోసం గాలింపు చేపట్టారు. రవి కరేబియన్ దీవుల నుంచి ఈ వెబ్‌సైట్‌ను ఆపరేట్ చేస్తున్నట్లు దర్యాప్తులో తేలింది.
గతంలో రవి తనను పట్టుకోవాలంటూ పోలీసులకే సవాల్ విసిరినట్లు వార్తలు వచ్చాయి. అయితే, ఇటీవల అతను ఫ్రాన్స్ నుంచి నేరుగా హైదరాబాద్‌కు వచ్చినట్లు సమాచారం అందుకున్న పోలీసులు పక్కా వ్యూహంతో వల పన్నారు.
కూకట్‌పల్లిలోని ఓ అపార్ట్‌మెంట్‌లో ఉన్న రవిని సీసీఎస్ పోలీసులు అరెస్ట్ చేసినట్లు మీడియా కథనాలు వెల్లడిస్తున్నాయి. ఈ అరెస్ట్‌తో ఐ-బొమ్మ కథ ముగిసినట్లేనని భావిస్తున్నారు.
అరెస్ట్ అనంతరం, పోలీసులు సర్వర్లను పరిశీలిస్తున్నారని, అతని బ్యాంక్ ఖాతాల్లోని రూ. 3 కోట్లను ఫ్రీజ్ చేసినట్లు సమాచారం. విదేశాల్లో ఒంటరిగా ఉంటున్న రవి, హైదరాబాద్ రాగానే పోలీసులకు చిక్కడం గమనార్హం.