న్యూస్ డెస్క్: చంద్రబాబు: ఆంధ్రప్రదేశ్ రాజకీయాల్లో వైఎస్సార్ కాంగ్రెస్ పార్టీకి అసెంబ్లీలో కేవలం 11 సీట్లే ఉన్నప్పటికీ, 40 శాతం ఓటు బ్యాంకుతో బలమైన ప్రతిపక్షంగానే ఉంది. ఈ నిజాన్ని విస్మరించి, జగన్ను తేలిగ్గా తీసుకుంటున్న సొంత పార్టీ నేతలు, మంత్రులపై ముఖ్యమంత్రి చంద్రబాబు నాయుడు తీవ్ర అసహనం వ్యక్తం చేశారు. ఆయన విషయంలో “మాకెందుకులే” అనే ధోరణిని వీడాలని గట్టిగా క్లాస్ తీసుకున్నట్లు తెలుస్తోంది.
ఇటీవల పార్టీ ముఖ్య నేతలతో నిర్వహించిన సమావేశంలో చంద్రబాబు ఈ విషయంపై సీరియస్గా స్పందించినట్లు సమాచారం. జగన్ అండ్ కో చేస్తున్న “విష ప్రచారాన్ని” ఎందుకు సమర్థవంతంగా తిప్పికొట్టడం లేదని ఆయన ప్రశ్నించారు. కేవలం ప్రభుత్వం మాత్రమే స్పందిస్తే సరిపోదని, పార్టీ నాయకులంతా రంగంలోకి దిగాలని ఆయన దిశానిర్దేశం చేశారు.
ప్రభుత్వం చేస్తున్న మంచి పనులను ప్రజల్లోకి తీసుకెళ్లడంతో పాటు, ప్రతిపక్షం చేస్తున్న అసత్య ఆరోపణలను ఎప్పటికప్పుడు ఖండించాలని మంత్రులకు, నేతలకు ఆయన స్పష్టం చేశారు. మీడియా సమావేశాలు, బహిరంగ సభల ద్వారా వాస్తవాలను ప్రజలకు వివరించాలని, లేకపోతే వైసీపీ ప్రచారమే నిజమని నమ్మే ప్రమాదం ఉందని హెచ్చరించారు.
జగన్ ఐదేళ్ల పాటు రాష్ట్రాన్ని పాలించారని, కేవలం 16 నెలల క్రితమే అధికారం కోల్పోయారని చంద్రబాబు గుర్తుచేశారు. రాష్ట్రంలో వైసీపీ తప్ప మరో బలమైన ప్రతిపక్షం లేనందున, ప్రభుత్వంపై ఏమాత్రం వ్యతిరేకత వచ్చినా అది నేరుగా జగన్కే లాభిస్తుందని ఆయన విశ్లేషించారు.
ఈ “జగన్ ఫ్యాక్టర్ను” దృష్టిలో ఉంచుకుని, పార్టీ యంత్రాంగం మొత్తం అప్రమత్తంగా ఉండాలని, వైసీపీ చేసే ప్రతి విమర్శకు ధీటుగా బదులివ్వాలని చంద్రబాబు ఆదేశించారు. నాయకులందరూ క్షేత్రస్థాయిలోకి వెళ్లి ప్రజలతో మమేకం కావాలని సూచించారు.
మొత్తం మీద, ప్రతిపక్ష నేతగా జగన్ను తక్కువ అంచనా వేయవద్దని, ఆయన వ్యూహాలను చిత్తు చేయాలంటే సమష్టిగా పోరాడాలని చంద్రబాబు తన శ్రేణులకు స్పష్టమైన సందేశం పంపారు. ఈ హెచ్చరికతోనైనా టీడీపీ నేతల వైఖరిలో మార్పు వస్తుందో లేదో చూడాలి.