న్యూస్ డెస్క్: సైబర్ నేరగాళ్లు అమాయక ప్రజలను మోసం చేయడానికి ఎక్కువగా ఎంచుకునే మార్గం ‘ఫిషింగ్’. అసలు బ్యాంకు వెబ్సైట్ను పోలిన నకిలీ వెబ్సైట్లను సృష్టించి, లాగిన్ వివరాలను దొంగిలిస్తున్నారు. ‘.com’ లేదా ‘.in’ బదులు చిన్న మార్పులతో లింకులు పంపి ఖాతాలు ఖాళీ చేస్తున్నారు. ఈ తరహా మోసాలకు అడ్డుకట్ట వేసేందుకే భారతీయ రిజర్వ్ బ్యాంక్ (RBI) ఒక కీలకమైన, భద్రతాపరమైన నిర్ణయం తీసుకుంది.
ఈ కొత్త నిబంధన ప్రకారం, దేశంలోని అన్ని వాణిజ్య బ్యాంకులు తప్పనిసరిగా తమ వెబ్ అడ్రస్లను (డొమైన్) ‘.bank.in’కి మార్చుకోవాలి. ఇది అత్యంత సురక్షితమైన, కేవలం బ్యాంకుల కోసం రిజర్వ్ చేయబడిన డొమైన్. ఈ ఏడాది ఏప్రిల్లో జారీ చేసిన ఈ ఆదేశాలను అమలు చేయడానికి అక్టోబర్ 31ని గడువుగా నిర్ణయించారు. చాలా బ్యాంకులు ఇప్పటికే ఈ మార్పును పూర్తి చేశాయి.
ఈ మార్పు ఫలితంగా, ఇకపై వినియోగదారులు తమ ఇంటర్నెట్ బ్యాంకింగ్ కోసం లాగిన్ అయినప్పుడు, బ్రౌజర్ అడ్రస్ బార్లో పాత ‘.com’ లేదా ‘.in’కు బదులుగా కొత్తగా ‘.bank.in’ అనే చిరునామా కనిపిస్తుంది. ఇది చూసి కంగారుపడాల్సిన అవసరం లేదు. ఇది ఆర్బీఐ ఆదేశాల మేరకు మీ భద్రత కోసం చేసిన అధికారిక మార్పు మాత్రమే.
పాత డొమైన్ల సంగతేంటి? వినియోగదారులు పొరపాటున పాత ‘.com’ అడ్రస్ను టైప్ చేసినా, ఆయా బ్యాంకులు ఆటోమేటిక్గా వారిని కొత్త, సురక్షితమైన ‘.bank.in’ డొమైన్కు దారి మళ్లిస్తాయి (రీడైరెక్ట్). కాబట్టి లావాదేవీలకు ఎలాంటి అంతరాయం ఉండదు, కానీ భద్రత మాత్రం పెరుగుతుంది.
ఈ భద్రతా చర్య కేవలం బ్యాంకులతోనే ఆగడం లేదు. భవిష్యత్తులో బ్యాంకింగేతర ఆర్థిక సంస్థల (NBFC) కోసం కూడా ప్రత్యేకంగా ‘.fin.in’ అనే డొమైన్ను తీసుకురావడానికి ఆర్బీఐ ప్రణాళికలు సిద్ధం చేస్తోంది. ఇది మొత్తం ఆర్థిక రంగానికి డిజిటల్ భద్రతను అందించనుంది.
కాబట్టి, బ్యాంకింగ్ వినియోగదారులు ఈ మార్పును గమనించాలి. ‘.bank.in’ డొమైన్ ఉంటేనే అది అసలు వెబ్సైట్ అని నిర్ధారించుకోవచ్చు. మీకు ఏదైనా లింక్ పట్ల అనుమానం వస్తే, దాన్ని క్లిక్ చేయకుండా, నేరుగా మీ బ్యాంకు కస్టమర్ కేర్కు ఫోన్ చేసి సందేహాలను నివృత్తి చేసుకోవడం ఉత్తమం.