న్యూస్ డెస్క్: భారత్ ఆసియా కప్ గెలిచి నెల రోజులు కావస్తున్నా, ఆ విజయానికి ప్రతీక అయిన ట్రోఫీ, మెడల్స్ ఇప్పటికీ దేశానికి చేరలేదు. ఈ వ్యవహారం ఇప్పుడు కొత్త మలుపు తీసుకుంది. పాకిస్థాన్ క్రికెట్ బోర్డు (పీసీబీ) చీఫ్, ఆసియా క్రికెట్ కౌన్సిల్ (ఏసీసీ) చైర్మన్ మొహ్సిన్ నఖ్వీ, ఆ ట్రోఫీని రహస్య ప్రదేశానికి తరలించినట్లు సంచలన కథనాలు వెలువడుతున్నాయి.
సెప్టెంబర్ 28న ఫైనల్లో పాకిస్థాన్ను ఓడించి భారత్ ఛాంపియన్గా నిలిచిన విషయం తెలిసిందే. అయితే, పహల్గామ్ ఉగ్రదాడి నేపథ్యంలో నెలకొన్న ఉద్రిక్తతల కారణంగా, నఖ్వీ చేతుల మీదుగా ట్రోఫీని స్వీకరించడానికి భారత జట్టు నిరాకరించింది. దీంతో అవమానంగా భావించిన నఖ్వీ, ట్రోఫీని, మెడల్స్ను తానే తీసుకువెళ్లి ఏసీసీ ప్రధాన కార్యాలయంలో భద్రపరిచారు.
అయితే, ఇటీవల ఏసీసీ కార్యాలయానికి వెళ్లిన ఓ బీసీసీఐ అధికారికి అక్కడ ట్రోఫీ కనిపించలేదు. సిబ్బందిని ఆరా తీయగా, నఖ్వీ దానిని తనతో పాటు అబుదాబికి తీసుకెళ్లారని, ప్రస్తుతం అది అక్కడే ఓ గుర్తు తెలియని ప్రదేశంలో ఉందని చెప్పినట్లు సమాచారం.
ట్రోఫీని భారత్కు అప్పగించే విషయంలో నఖ్వీ మొదటి నుంచీ షరతులు విధిస్తున్నారని ఆరోపణలు వస్తున్నాయి. ఇప్పుడు ఏకంగా ట్రోఫీని ఏసీసీ కార్యాలయం నుంచి తరలించడం ఈ వివాదాన్ని మరింత ముదిర్చింది. దీనిపై బీసీసీఐ ఎలా స్పందిస్తుందోనని సర్వత్రా ఆసక్తి నెలకొంది.
ఈ పరిణామం ఇరు దేశాల క్రికెట్ బోర్డుల మధ్య ఇప్పటికే అంతంతమాత్రంగా ఉన్న సంబంధాలను మరింత దెబ్బతీసే అవకాశం ఉంది. ఆసియా కప్ విజేతకు దక్కాల్సిన గౌరవం, ట్రోఫీ ఎప్పుడు భారత్కు చేరుతుందోనని అభిమానులు ఆందోళన చెందుతున్నారు.
ఈ ట్రోఫీ వివాదంపై ఏసీసీ, పీసీబీ లేదా నఖ్వీ నుంచి అధికారిక ప్రకటన రావాల్సి ఉంది. అంతర్జాతీయ క్రికెట్ వేదికపై జరిగిన ఈ పరిణామం క్రీడాస్ఫూర్తికే మాయని మచ్చగా మిగిలిపోనుంది.